همبرغر لحم ... صنع منزلي

[ابو قاسم]

سلام عليكم

الطبخة توني امس طبخنها
نزلتها في موضوع اخر
بس بمناسبة افتتاح هذا القسم اضيفها ليكم :)



المكونات
بصل
ثوم
زنجبيل
ملح
تابل
بقدونس
فلفل اخضر

نفرمهم بالخلاط

بيض وبقسمات الحين بقول ليكم ليش

اولا نبهر اللحم ونخليه في الثلاج فترة

هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 800x600 .

هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 800x600 .

هذه الصورة مصغره ... نقره على هذا الشريط لعرض الصوره بالمقاس الحقيقي ... المقاس الحقيقي 800x600 .

نفرم البصل والتابل والزنجبيل والثوم والبقدونس



نفرم المكونات اللي خليتها فوق
طبعا بيكون اللحم مفروح وبهرناه وحمضناه وخليناه في الثلاجة





عجنا الخلطه وخلطناها مع المكونات



ضفنا بيضة وحده مع البقصمات



عجناهم لين تماسكوا زين ما زين

اخذنا صينية فرن وفرشناها بالزيت زيتون او الدهن العادي



صفينا اللحم بعد اكويره وتدويره





ثلجناه



بعد التثليج لمده لا تقل عن ساعه في الخزان او الفريزر

طلناه وسخنا الفرن وخليناه حار جدا
دخلنا الصينية ولحرارة متوسطة
لمده من 15 الى 20 دقيقة

وهني وعافيه

[دلع البنات]

شكلها وايد لذيذه وسهله نم نم حلو نم نم لذيذ بسويها

[ابو قاسم]

عوافي مقدما اخت دلع البنات
بس لا تنسون طرشوا ليي وحده منهم
عشان احكم بالطعم وكل شيء له هههه :)

[شوق الاحبة]

تسلم الايادي
خوش همبرغر ..
ان شاء الله انجربها ونطرش لكم صحن فيه روتيتين ..

[بنت الهواشم]

شكلها روعه
بس اني كسوله ماليي في الطبخ

[ابو قاسم]

شوق الاحبة

تسلمون
واحنا ننتظر الروتيتين مو ما يوصلون ههه

بنت الهواشم
الطبخ سهل حده

عندكم هالموضوع تصفحوه شوفوا بعض صوره

الموضوع يحتوي على 70 صفحه
بتتعبون وانتون تشوفون مختلف الطبخات
لمختلف الاعضاء :)
http://www.mbahrain.net/vb/showthread.php?t=17047

في طبخات سهلة
حتى لو واحد ما يعرف يطبخ
مجرد يتقيد بالمقادير والطريقه بتستوي الطبخه :)

[لبؤة البحرين]

أخوي بو قاسم بصراحة طريقة حلوة
بس أنت يالس تقول لنا همبرجر والهبرجر يعني برجر لحم الخنزير، بس طريقتك حلوة وسهلة وأحلى شي فيها إن ما فيها قلي.

أنا بسويها بس بتكون بيف برجر

[ابو قاسم]

لا مو شرط البرجر لحم خنزير هههه
كمسمى قلت انا همبرغر
لان تعودنا على الاسم

اللحم اخذت لحم غنم مفروح
بس نصيحه عشان تتماسك عدل

تخلصوا من الماي كله
خلوا اللحم في مشخال لين ينشف من الماي :)

[Cross Fire Technology]

بالعافية ان شاء الله جوعتني

[ابو قاسم]

يعافيكم الرحمن

خلاص باجر سووها له
تراها سهلة
وانا سويت 12 همبرغر و 4 كفته

وكله ما كلفني دينارين
مو احسن من ما اشتري ليي من مطعم همبرغر
ويا ب 3 وبعضه ب 6 ربيات
وهو خرطي !؟!؟